عشق حتى الموت

من طرف **jri7 hajr** السبت مارس 20, 2010 10:10 pm

شخصيات القصة الاساسيه والباقي سوف تأتي بالاحداث..بعض اسماء الشخصيات متشابهه..لكون القصة حقيقية لم نستطيع تغير الاسماء..

فكل الشخصيات تعيش على هذه الارض الطيبه..
فبعضهم بالنسبة لي الروح والبعض الاخر الالم...

لن اطيل عليك كتاباتي هذه قصة حياة صديقتي
وتوام روحي ..." فاطمة "...

عائلة فطوم
1- ابو فطوم
2- ام فطوم
3- سلمان
4- ريم ( زوجة سلمان )
5- محمد
6- سارة
7- فطوم

عائلة هادي
1- هادي
2- ام هادي
3- هنادي

عائلة ذكرى
1- ذكرى
2- ام ذكرى
3- حمادي

عائلة ايمان
1- ابو فيصل
2- ام فيصل ( عمة فطوم )
3- زهور
4- ايمان
5- دنيا
6- فيصل
7- حسن
8- زوجة فيصل

عائلة رزان
1- ام رزان
2- ابو رزان
3- رزان
4- روان

عائلة شهد
1- ام شهد ( مرت عم فطوم )
2- شهد
3- ندى

الاصدقاء
1- مريم
2- فاتي

باقي الشخصيات

شخصيات المدرسه الادارية

1- المشرفة الاجتماعية
2- المديرة
3- مجموعة من المدرسات
(( فرنسي , الرياضيات , عربي ))

الطالبات
1- سميه
2- ناهد

شخصيات المنتدى
1- كرستينا من المغرب
2- مهاوي من المملكة العربيه السعوديه
3- سهر من سوريه

فطوم بنوته عمرها 18 سنة آخر العنقود في بيتهم طبعا" مو في بيتنا هههههه..عندها اخوا اثنين و اخت وحدة...اهيا وايد حبوبه...وحساسه اكثر من الازم..بنت رزينه تكانه....ماتعترف بالحب و لا قصص الحب برغم من انها من هواياتها كتابة الخواطر و اسلوبها حيل حلو..كانت البنت الوحيدة اللي بالصف المدرسه ترفض هالقصص و تقول الحب بعد الزواج....واهيا الوحيدة اللي كانت بعيده عنا ..كنا نحسها غامضه وايد...
احنا كلنا كنا قروب بالمدرسه...
(( فطوم و رزان الا اهيا انا و مريم و فطوم بنت ثانيه..بس تشابه الاسماء لا يفسد القضيه ههههههههههه ..وكذا بنت من الجاليات العربيه بالبحرين... سمية و ريم و كذا بنوته لها دور حقيقي بحياة فطوم.. ))

المهم فطوم تعرفت على صديقة عن طريق مجلة " ماجد " هههههه من قبل 7 سنوات و صاروا اصدقاء وايد و قريبن الى بعض...صديقتها اسمها ذكرى من تونس...
ذكرى بنت يتيمة عايشه مع امها و خواها الوحيد...
تعلقوا ببعض وايد...وحبوا بعض وايد و عاشوا صداقة حقيقة برغم من انهم ما التقوا و لا مرة...استمرت علاقتهم عن طريق المراسلة بالبريد و الاتصالات ..حصلت مشكلة بينهم...وماكنت تدري فطوم انه هالمشكلة راح تؤدي الى قطع العلاقة ...!!!

فطوم قالت : معقوله مع بعد هالسنين ولسبب بسيط نفترق...!!
بقيت جنبها انا...وكل الاصدقاء...

حاولنا نخليها تنسى اللي صار وانه مو معقول يفترقوا لسبب بسيط...
مجرد في حالة غضب رفعت فطوم صوتها على ذكرى و راحت تصارخ...!!
ذكرى تعبت وايد وايد لانه حساسه وكل شي يأثر عليها...وانقطعوا عن بعض لمدة شهور ....
فطوم...صارت انطوائيه اكثر من الازم وكانت كل ما يشوفونها اهلها و خوانها بهالحال يهاوشونها...ظلت بالايام ماتاكل...صديقة عمرها...معقول تنقطع علاقتهم....
منو راح يشاركها همومها...!! منو راح يخفف عنها آلامها...!!
كنت نحاول بالمدرسه نخفف عنها و نسوي مقالب
بالحصص ...نحاول نخليها تلتهي ويانه وتنسى اللي اهيا فيه..

رزان : فطوم...تبين ماي بارد..
مريم : لا يفوتج فطوم الماي ثلج ولا ماي فريج بو صالح ههههههههه ..اخذي بردي قلبج شوي..
فطوم : يالله وياكم...

وراحوا يغسلوا وجوهمم...والمعلمة تشرح الدرس..
التفت لهم...!!
قالت احنا مو بحمام عشان كل وحدة تغسل ويها..
وعطتنا محاضرة طوويله..

اهيا لو تدري انه احنا كنا ناكل شنو راح تسوي !

عدى اليوم على الف موقف...وكان كل همنا نخلي فطوم تنسى..

صارت الساعه 1 ونص و كل بنوته رجعت البيت..
اتصلت انا بفطوم..
رزان : هلا عمري هلا قلبي هلا حياتي هلا فطوم
وحشتيني ما شفتج من سنييين ههههههاااااي..
عاش من سمع صوتي..
فطوم : هلا رزون.توني راده من المدرسه..تعبانه وايد
وصاكه فيني الدينا..
رزان : شنو رايج امر عليج نتغدى في بيت مريم نسوي لها مفاجاه
هههههههههههههه..
فطوم : لا لا مو حلوة..فشله...
رزان : يالله كلنا ربع وعادي بناخد ويانه الغدا...
فطوم : اوكي...والله القعدة وياكم تنسيني هموم الدنيا الله لا يبعدني عنكم يا احلى ربع بالدنيا..
المهم فطوم قالت الى امها تجهز لها من الغدا لانه رزان راح تجيها و يروحون بيت مريم يتغدون...
صارت الساعه 2 ونص و جت رزان الى فطوم و راحوا الى مريم
طقووا الجرس...
موجودة مريم..!!
اخوها : روحوا لها الغرفه
رزان و فطوم دخلوا غرفة مريم ..والله لا يوريكم...
عافستها عفاس..
رزان ماطقت الباب..فتحته على عدال...
لقيت مريم نايمة..!
قالت نايمة مو نايمة انا بقول الى خالتي ام مريم تحط لنا من غذاهم..
وبنتغدى..
واهيا قعدت اهلا" و سهلا" ما قعدت بالطقاق...
ههههههههههههههه..
تغذينا وكل شي..انا و فطوم..
ومريم نايمة...
بعدها تذكرت علينا تقرير الى الكيمياء..
وهالمعلمة فلم هندي حصتها..
تشرح لنا بميكرفون..
وكنا نقول لها التشبة بالمغنيات حرام
ههههههههههههههههه
المهم شغلت انا جهاز مريم و معاي فطوم..
طلعنا تقارير..
وكل شي و الهانم نايمة...واهيا بالاحرى طول اليوم نايمة حتى بالمدرسه كله نايمة...
قالت فطوم خليني شوي اتصفح الجريدة يمكن نشروا لي
وقعدت فطوم على الجهاز...(( بس ما تكسر )) هههههه
دخلت منتديات وايد وانا يمها.....وتحاول تقتل الجو قبل ما يقتلها...

وكانت تنزل خواطرها الحزينه اللي تعبر عن حالها...وماكانت حاطه ببالها شي...مجرد طرح المواضيع...
وهذي احدى خواطرها... اللي عجبتني وطلبت منها ان تنشرها بأسمي بأحد الجرايد..ونشرتها 

******************

على اكتافي
كطفلة صغيرة
احمل ذكرياتنا وامضي
من ليلة الى ليلة
ومن نجمة الى نجمة
غير واعية ٍ
لمايحدث حولي من تبدلات في السنين
فأطلب من الربيع
ان ياخذ الوانه وابتساماته
ويرحل
ومن الشتاء
استعير عواصف ثلجية
لاطفئ فيها حرائق الشوق
والغربة
ويزورني المطر مرحا
ً ويفهم باني وحيدة
وتناديني المرايا
والاغاني
والنجوم المضيئة
فتفهم باني وحيدة
عندها
اخبأ عند كل زهرة غافيه
وكل غيمة مهاجرة
وكل دمعة ناعمة
سرا ً صغيرا عنكِ
وأحزن
لأنك..
لأنك تركتني
كطفلة صغيرة احمل ذكرياتك ِ
وأمضي

***************
ولمى كنا نتصفح المنتديات..اللي اهيا مشتركة فيها..
جتها إضافة بالمسنجر..من عضو اسمه هادي..
ماكنت تدري هذا منو...
قام يكلمها بس اهيا ترفض لانها قالت انا ما اكلم حد ما اعرفه...
قالت لي رزان..شوفي هذا منو...!!
تعرفيني اولاد ما اكلم...ومالي مزاج خرابيطهم..
ممكن اتعرف...وما ادري شنو...
المهم انا هم قلت لها مالي مزاج...وسكرنا المسنجر...
وصحيت مريم...وقعدنا نحل الواجبات...
هههههههههههه ذاك الوقت كنا بصف اول ثانوي... 

صار الليل...والكل رجع البيت...

فطوم فتحت جهازها...تشوف الردود على الخواطرها..
وكان في احد الردود رد الى عضو اسمه هادي..!!
فطوم..وايد شدها هالكلام و طريقة الرد..
دخلت المسنجر وشافته اون لاين..!!
بس اهيا ما حبت تكلمه...
لانه ما تكلم حد ماتعرفه...

المهم مع مرور الوقت..هادي

راح يراقب ردودها بالمنتدى..وشلون نفستها...
وبما انه المراقب العام بالمنتدى..طلع مكان سكنها وعرف انها من البحرين...وهوا طبعا" كان من الكويت...
وفي احد المرات...كلمها من بعد ما طلعت من المستشفى لانها صارت وايد تعبانه نفسيا"...
قال لها.. : اذا انتي حزينه و مضايقه لفراقك شخص عزيز عليك..
هونيها وتهون ترى مصايب الدنيا اكثر واكثر من ما تتخيلييين..
فطوم : تتوقع يا هادي عمري 16 سنة عمر اتحمل كل هذا..
انا ما حبيت شخص عشان الكل يلومني و يقول لي ابتعدي...
علاقتي شريفه مع صديقتي....
هادي : معقوله !! عمرج 16...لالا
اقطع يدي اذا مو في الثلاثينااات !!
فطوم : ههههههههه ليش لهدرجة كتاباتي و طريقتي باينه اني اكبر من عمري ؟
هادي : يعني اسلوبج كأنه فيج هموم الدنيا كلها...
فطوم : انا ما عمري تعبت كثر هالمرة...هذي صديقة عمري شلون نفترق.....
هادي : عارف العلاقة علاقة صداقة و اخوه...
بس حرام اللي قاعدة تسوينه بروحج...الناس تروح و ترد ...
بس الروح اذا راحت محد يرجعها..
فطوم : هادي ياخوي انا تعبت ذكرى كانت اقرب الناس لي والوحيدة اللي اشكي لها...وقول لها اللي بقلبي ....لانه محد من اهلي مفتكر فيني ويسال عن حالي...او بالاحرى...محد يكلمني الا وقت الغذا او اذا بنطلع....
يعني تخيل انسان متعود عليه طول اليوم معاك فجأه يبتعد عنك...!!

هادي : قولي لي شنو صاير ...وشنو السبب..يمكن القى لج حل..!!
فطوم : ما اقدر ...ما اقدر حاسه حالي مخنوقة و لو ظليت اكثر مجابلة الكمبيوتر راح ينفجر راسي....اعذرني اخوي هم امي راح تفضل النت و تاخذ مني الهاردسك...!!

هادي: بس ثواني تعالي..شنو فيج قولي لي...والله حرام عمرج 16 سنة و قاعدة تسوين بروحج كل هذا ....ترى الله راح يحاسبج...

فطوم :...............OFFLINE

**********************
فطوم راحت...وظل هادي يسأل نفسه معقول في صداقات حقيقة بهالزمن...!!
عشان يخلي هالبنت تعذب روحها بهالطريقة الجنونية....
وراح يشوف مواضيعها كلها...ويقرء كل سطر من خواطرها...لين ما عرف أسلوبها...في كل كلمة تكتبها....

وظلت فطوم شغله الشاغل بالمنتدى.....

اما فطوم....فراحت تقرء الرسائل اللي كانت توصلها من ذكرى و باقي اصدقائها
اللي تعرفت عليهم من مجلة " ماجد "...!!!

(( وهاي بعض صور من رسائلها اللي واصتها.. ))

وما خطر ببالها هادي...وما سألت نفسها ليش اهوا يحاول يعرف شنو فيها...!!
لانها تفكيرها بريئ و طفوليه حيييل : )

وماكنت تدري انه الدنيا بدور و بتخليها تعشق و تجنن على هادي...

هالانسان اللي تعب ولازال يتعب عشان يرد فطوم إنسانه طبيعييه...
مثلها مثل أي بنت بسنها...

المهم...بنفس الليلة...
فكرت فطوم تدز رساله الى ذكرى و تكتب لها كل شي وتذر لها هديه...
دقت على رزان..و مريم و صار 3 خطوا...وتكلموا بقصتها...
وكأنه ما عندهم الا قصة فطوم و ذكرى الا بعدها انقلبت الى فطوم و هادي
هههههههههههه...

اتفقوا على كل شي وقالوا بعد طلعتهم من المدرسه بيروحون السيف و لا
الدانه..يتغدون و يشترون هديه الى ذكرى....

ولمى صار الفجر...
وكل بنوته تجهزت الى المدرسه.......ومثل كل يوم لازم اذا مو مشغلين الجهاز
يدقون الى بعض رنات او يتصلون لبعض و يصبحون على بعض...

فطوم و رزان و مريم في الطابور...

مريم لابسه جوتي احمر....

ورزون متكحلة.....(( يا دافع البلا من صباح اللله ههههههه ))
مثل كل يوم لازم يجون وفي شي ملفت فيهم ولا يجوزون..وبذات مريم....

صار تفتيش...وحاله....وطلعوا رزان و مريم الى المشرفة...
وعطوهم تعهد....
وظلت فطوم مع باقي البنات...
كان عندهم اول حصة حاسوب...
رحت بسرعه فتحت المنتدى............
لقت رساله...من هادي.................

اتمنى منج تردين على رسالتي و طمنيني عليج كل يوم...
ارجوج اختي..اتمنى ما تخلي ببالج اني شاب ابي اتسلى او شي ثاني...
اتعبريني اخوج الكبير تراني اكبر منج بعشر سنوات...
وحالتج وايد مأثر فيني و ظليت طول البارح أسأل نفسي ..
معقول في صداقة حقيقة ...معقوله في حب بهالزمن...!!
وكلام وايد ما اقدر اذكره ..(( لانه فطوم مانعتني هههههههه ))

فطوم حاولت ترد على الرساله.....بس المسكينه ماتدري انه المعلمة وراها و شافت الرساله و حاولت تسوي لها قصة ....

معلمة الحاسوب : رسائل غراميه و بالمدرسه ...!!
فطوم : معلمة والله هالرساله بالمنتدى وانا ما ادري عنها...

معلمة الحاسوب : والله اذا تكرر هالشي خلي ببالج الموضوع بيوصل الى اهلج...!!

فطوم نزلت راسها وحاولت تسكت وماترد على المعلمة...اللي طلعتها غلطانه قبل ما تدري شنو صاير....

رجعت رزان...و مريوم...وهما يضحكون كالعادة....

رزان : فطوم شنو فيج مضايقه ...؟

مريم : فااااااااااااتي فطوووووووووووم فطم طم....اكييد المعلمة خليها عنج واكيد شي تافه و ماله معنى....

فطوم : انا فتحت المنتدى و لقيت رساله من هادي ....
وانه يسأل عني وشنو صار لي...

مريم : شكله الولد طاح في شباك الحب هههههههههه

فطوم : لا لا شكله ما عنده هالسوالف ....وانا هم عادته مثل اخوي...ومستحيل العلاقة تتطور لانها علاقة نت و ما اوثق فيها لو شنو يصير...

رزان : وهذا شنو يبي داز لج رساله ؟

فطوم : يسأل عني و يقول لي يبيي حاول يساعدني...لانه حالتي وايد مضايقته...
وكلام...ولمى حاولت ارد عليه طاحت على المعلمة و راحت تهدد ...

والله رزان ما سويت شي....غلط....

رزان : ما عليج منها والله لقلب لج الحصه....ضحك و خليها تندم انها صارخت عليج...

وكملت الحصة....ويازعم...
رزان منتبهه و تشارك....

المعلمة شبكة كل الاجهزة معاها و قالت الى الطالبات كل وحدة تشوف جهازها راح اشرح لكم....
اما رزان راحت قالت الى كل الطالبات...كلكم سوا الجهاز ريستارت....
هههههههههههههههههههههههه و الكل انقطع عنده و المعلمة قالت اكيد بالموضوع شي....
على ما المعلمة راحت تشوف اجهزة الطلب....
مريم قطعت النت....وخلت المعلمة تعصب اكثر....
وطول الحصه المعلمة تسال منو قطع النت...!! و شنو فيهم الاجهزة ما يرضون يشبكون وياي...لين ما طق الجرس...
هههههههههههههههههههههههههههههه

عدت الحصص على خير....
وصار وقت الظهر.....تجهزوا و راحوا الدانه يتغدون....
وحاولوا يشترون هديه الى ذكرى....وكل شي....

لين ما صار المغرب....

وبذاك الوقت هادي..كان يحاول يطلع رقم فطوم...من الرسائل الخاصه قال يمكن
دزت رقمها الى احد العضوات....
لين ما طاح على الرقم......!! ولقى رقمها.....
حاول يتصل لها بس كان خايف....
دز مسج فاضي لها....!!

اهيا فزت من مكانها...

فطوم: رزوووووووون واصلني مسج فاضي من رقم كويتي !!!

رزون : امممممممممممممممم...شي حلو يوصلج مسج من الكويت هههههه

مريم.. : بدينااا بهالحركات اخاف انج مرقمته و تبين تسوين روحج ماتدرين
ههههههههه...

فطوم : والله العظيم رقمي ما عطييته حد وانتو تعرفون مستحيل اوثق في الشباب...

وقالتها بصريح العبارة كلهم خونه...!!

واللي يسمعها يقول انها ...عايشه الف قصة حب...

رجعنا بيت فطوم...وذاك اليوم اتذكر ما حلينا الواجبات....وكنا نغلف الهديه و يا فطوم لانه بعدها بنروح البريد يوم ثاني....

مريم : فطوم وين الهاردسك ليش كمبيوترج أقرع ههههههه !

فطوم : امي ما خذته و تقول ما برده الا لمى تردي مثل الناس...

رزان : لا تخافون الحين ايييبه لكم...خالتي ما ترفض لي طلب...

راحت رزون الى ام فطوم...

رزان : ها خالتي شلونج شخبارج عساج طيبه....ما عليج امر بغيت الهاردسك ضروي علي تقرير ما سويته و النت مفطوع عندنا تعرفين بتلكو كل يوم و الثاني و ما قطوا النت !!

ههههههههههههههههههه

ام فطوم : اوكي بس لا طولوون....

رجعت رزون و بيدها الهاردسك...وتهاوشوا كل وحدة تبي شي ...مريم طبعاا" تبي تدخل حدود....كعادتها...
و رزان تبي تفتح الايميل...و فطوم تبي تشوف المنتدى....!!!

فتحت رزون الايميل اول شي بما انها اللي جابت الهاردسك..
و بعدها فطوم...رحات ردت على هادي...وكتبت له...

اخوي هادي...
اتمنى ما كونت عني فكرة غلط...او بالاساس انك ماخذ عني فكرة غلط و هالشي اللي خلاك تدز لي رسائل و تسال عني ....
يمكن تقول معقدة...بس هذي شخصيتي....وما صار لنا شي من كلمتك بالمسنجر..عشان تهتم فيني لهدرجة...

وآسفه اذا ضايقتك...
بس انا ما احب صداقات النت...وبذات مع الاولاد...
لانه ماكو صداقة بين رجل و امرءه...

وسلام

(.........) طبعا" كانت كاتبه اسمها اللي بالمنتدى بس اهيا الحين مب راضيه اكتب شنو ... هههههههه...

وقامت فطوم و قالت لمريم لا تسكري صفحة المنتدى و خليني بالمتواجدون حاليا".....خلت مريم بحدود و ما ادرك ما يحصل بحدود..!!!

ظلت تسأل رزان...شنو رايج بصداقات النت...
وهل توثقين باللي يكلمج..انه بنت لو قال لج بنت...او يطلع جذاب...!!

رزان : والله ما ادري شقول لج بس انا عمري ما تعرفت على احد بالنت...
لاني مثلج تقدرييين تقولين ما اوثق...بحد....

عدت الساعات و تعشوا.. و رزون و مريم راحوا بيتهم و تفقوا على انهم يحاولوا يتسربون من المدرسه و يروجون مجمع البحرين لانه فيه بريد ههههههههههه....

ام فطوم نسيت....موضوع الهاردسك...

وفطوم استغلت الفرصه و ظلت سهرانه تقرء خواطر و تتصفح المنتدى...ولقت هادي اون لاين ..طول اليوم...
((ألمسكين عذبته من يشوفها اون اهيا تطلع من المسنجر ))

دز لها ايميل...
اختي...لو لي خاطر عندج...كلميني بالمسنجر ثواني ارجوج...

نسيت فطوم الرساله...لانها كنت مشغوله مع كتابة الخواطر...(( ما ادري شنو تقرب لنزار قباني هههههههههه ))

دخل هادي اون لاين وكانت الساعه بحدود 12 ونص الليل...

كتب لها اختي اعتبريني طبيب...اعتبيريني اخوج عمج ابوج خالج..اعتبريني أي شخص لازم يكون بحياتج و انتي تحبين تشكين له....

قالت له : لهدرجة موضوعي شاغلك..!!

هادي : والله ما اجذب عليج انا اول مرة اشوف بنت قلبها صافي...وما اهتمت لرسائلي او بمعنى ثاني...تجاهلتني..عكس بنات المنتدى...وايد خفيفات و يبون أي موضوع يفتحونه معاي عشان اكلمهم....

فطوم : ليش انت منوو اللي كل البنات ميتييين عليييك..!!

هادي : هههههههه لا من صجي اختي..انتي صار لج كم شهر معانا ماتدرين في البنات و حركاتهم...و لو اقول لج شنو يصيرر ما تصدقين...
اللي تحط لي عينها و لي تحط لي صورتها و تقول لي بليز احذفها طلعت بالغلط...
واللي يسمع انا ميت عليهم....انا شاب رزييين عمري 26 سنة...تشووفينه عمر شخص مال حركات مراهقيييين...!!

فطوم : وانا عمري 16 سنة يعني بابا ههههههه...!!

هادي : هههههههههههههههههههه ناديني بابا ماما أي شي بس اهم شي اني اكون شي بحياتج....

فطوم : مستغربه....حطت علامات استفهام اكييد بالمسنجر مو على ويههااا ههههههههههه...

هادي : شنو فيج ...والله من كل قلبي ابيج تكوني انسانه عاديه ما اقدر اشوف حد حزين ومضايق...وانا بإمكاني اني اساعده...

فطوم : الله كريم يا هادي و خليها على الله...

هادي::انا كل ساعه اقول لج اختي انتي شنو اسمج..!!

فطوم : فاطمة...

هادي : ونعم والله..عاشت الاسامي...

فطوم : تسلم..يا خوي...

هادي : فطوم انا مضطر اروح غصب عني والله وراي دوام والحين الساعه 2 ولازمني اصحى 5..

فطوم : امبييييييييييييه حتى انا لازمني اصحى...5 وراي مدرسه....

فطوم و هادي طلعوا من المسنجر...بس فطوم ما سكرت الجهاز....خلته اوي..!

وخلت راسها ونامت....
دقت المنبة او بالاحرى دقت لها مريم وصحتها...

على طول شغلت الشاشه و شافت هادي مصبح عليها...

صباح الورد يا احلى فطوم بالدنيا..يالله شدي حيلج بالدراسه وانشالله بالتوفيق..

ردت عليه...مشكور اخوي وانت هم انشالله يكون يوم حلو عليك....